ទិដ្ឋភាពថ្មីនៃមហោស្រពសិល្បៈយុវជនខ្មែរ ២០១២

សិល្បៈខ្មែរអមតៈ នឹងរៀបចំ មហោស្រពសិល្បៈយុវជនខ្មែរ ២០១២ លើកទី ៦ ចាប់ពីថ្ងៃទី១០ ដល់ថ្ងៃទី ១៦ ខែវិចិ្ឆកា ឆ្នាំ២០១២ នៅរាជធានីភ្នំពេញ ។

រដូវកាលថ្មីនេះ មហោស្រពសិល្បៈយុវជនខ្មែរ នឹងបង្ហាញជូននូវកម្មវិធីសម្តែងសិល្បៈខ្មែរដ៏រីករាយ នៅមហោស្រពចេនឡា រួមបញ្ចូលជាមួយក្បាច់រាំ ហ៊ីប ហ៊ប ដោយ ថាយនី ធូនស៍ (Tiny Toones)  ការរួមសហការសម្តែងរបាំសហសម័យដោយ ក្រុមសិល្បៈអម្រឹតតា(Amrita) ក្រុមអេពិក (Epic Arts) ការសម្តែងសុខា (Sokha) របស់ ក្រុមសៀកហ្វាពន្លឺសិល្បៈ ទស្សនីយភាពថ្មីនៃក្រុមយីកេ និងក្រុមសម្តែងដ៏ឆ្នើមដទៃទៀត មកពីអង្គការផ្សេងៗក្នុងព្រះរាជាណាចក្រកម្ពុជា ។ ជាងនេះទៅទៀត យើងនឹងរៀបចំបើកស្វាគមន៍អ្នកចូលទស្សនាដោយសេរីសម្រាប់ការសម្តែងក្រៅឆាកនៅមហោស្រពចេនឡា រួមមានល្ខោនស្រមោលស្បែកធំរបស់ សិល្បៈខ្មែរអមតៈ ការសម្តែងរបស់ ក្រសួងវប្បធម៌ និងវិចិត្រសិល្បៈ និងក្រុមរាំរបាំប្រពៃណីមិត្តសម្លាញ់  ។

សម្រាប់ទស្សនីយភាពឆ្នាំថ្មីនេះដែរ កម្មវិធីនឹងនាំមកនូវផ្ទាំងទស្សនីយភាពទម្រង់សិល្បៈរចនា និងសិល្បៈទស្សនីយភាព រួមជាមួយនឹងបទពិសោធន៍សម្តែងដ៏ល្បីល្បាញរបស់សិល្បករ លឿម លន ដែលលោកនឹងបង្ហាញអំពីទេពកោសល្យសម្តែងនៅលើទឹកកក ឆ្លុះបញ្ចាំងអំពីសភាវៈប្រែប្រួលនៃជីវិត មនុស្ស ។ ចំណែកខ្សែវីដេអូ “ការចងចាំ ក្នុងការចងចាំ” (In memory of memory)  របស់សិល្បករ ស្វាយ កែន និងវ៉ាន់ ណាត នឹងត្រូវដាក់បញ្ចាំងនៅមជ្ឈមណ្ឌលធនធានសោតទស្សន៍បុប្ផាណា ។ ក្រុមសម្តែងសិល្បៈដ៏អស្ចារ្យរបស់ គម្រោងស.ស នឹងបង្ហាញជូននូវទស្សនីយភាពដំបូងរបស់ខ្លួន រួមសហការជាមួយអ្នករស់នៅ វ៉ាយ បៀលឌីង ហើយយើងក៏នឹងមានដំណើរទស្សនកិច្ចមើលការតាំងពិពណ៌សិល្បៈ ដឹកនាំដោយក្រុមសិល្បករ/សិល្បការិនីរបស់យើងផងដែរ ។

មហោស្រពសិល្បៈយុវជនខ្មែរ គឺជាព្រឹត្តិការណ៍ពិពណ៌សិល្បៈមួយដែលរៀបចំឡើងពីរឆ្នាំម្តង ដើម្បីធ្វើការផ្សព្វផ្សាយ និងលើកកម្ពស់ការយល់ដឹងពីវប្បធម៌សិល្បៈខ្មែរ តាមរយៈសិល្បករ/សិល្បការិនីវ័យក្មេង ជាពិសេសក្នុងចំណោមអ្នកដែលមិនជាអ្នកអាជីពសិល្បៈ ។ មហោស្រពសិល្បៈយុវជនខ្មែរមានចក្ខុវិស័យបង្កើន និងលើកទឹកចិត្តដល់ប្រជាជនកម្ពុជា ឲ្យបានដឹង និងសិក្សាអំពីវប្បធម៌សិល្បៈខ្មែរ ព្រមទាំងពង្រឹងបណ្តាញទំនាក់ទំនងអ្នកសិល្បៈទាំងអស់នៅកម្ពុជា ។ តាមរយៈមហោស្រពនេះ កម្មវិធីមានគោលបំណងបង្កើតនូវការយល់ដឹង និងផ្សព្វផ្សាយអំពីវប្បធម៌ខ្មែរ នៅតាមសហគមន៍ និងពង្រីក សក្កានុពលសម្រាប់បុគ្គលម្នាក់ៗតាមរយៈគំនិតច្នៃប្រឌិតថ្មីនូវទម្រង់សិល្បៈរបស់ខ្មែរ ។

ពត៌មានបន្ថែម សូមអានៈhttp://www.cambodianartsfestival.org

សិល្បៈខ្មែរអមតៈ មានសេចក្តីសោមនស្ស​រីករាយ ក្នុងការងារជាដៃគូជាមួយអង្គការទាំងអស់ខាងក្រោម។ មហោស្រពនេះមិនអាចដំណើរការបានទេ បើសិនមិនមានការជួយគាំទ្រពីអង្គការទាំងអស់នេះ ។

ថាយនី ធូនស៍

សិល្បៈអម្រឹតា

ក្រុមសិល្បៈអេពិក

ហ្វា ពន្លឺសិល្បៈ

អង្គការមិត្ត សម្លាញ់

មជ្ឍមណ្ឌលធនធានសោតទស្សន៍បុប្ផាណា

គម្រោង​កម្ម​វិធីស.ស បាសាក់