ការហ្វឹកហាត់តម្លើងស្នាដៃថ្មីដោយជីលៀន រូតស៍( Gillian Rhodes)
ជីលៀន រូតស៍ (Gillian Rhodes) នាដសាស្រ្ត ជនជាតិអាមេរិក បាននិងកំពុងបើកសិក្ខាសាលាបង្ហាត់បង្រៀនរបាំសហសម័យដល់ក្រុមសិល្បៈអភិវឌ្ឍន៍ (Artistic Development) ដែលស្ថិតនៅក្នុងសមាគមន៍យុវជនសិល្បៈខ្មែរខេត្តសៀមរាប ពីថ្ងៃទី ១៧-២៨ ខែកញ្ញា ឆ្នាំ ២០១២។ សិក្ខាសាលានេះ មានគោលបំណងសំខាន់ផ្តោតទៅលើវិជ្ជានាដសាស្រ្ត បូករូមទាំងគំនិតឆ្នៃប្រឌិត និងការសម្តែង។ សិស្សទាំងអស់នឹងទទូលបានការបណ្តុះបណ្តាលរបៀបសហការគ្នាក្នុងការរាំជាក្រុម ព្រមទាំងយុទ្ធវិធីក្នុងការឆ្នៃប្រឌិតក្បាច់រាំ។ ពួកគេតម្រូវឲ្យប្រើប្រាស់ចំណេះទាំងអស់នេះដើម្បីបង្កើតក្បាច់រាំថ្មីៗ និងសម្តែងជាលក្ខណៈក្រុមតូចៗ នៅពេលកំពុងហ្វឹកហាត់ ហើយនឹងត្រូវយកទៅសម្តែងជាផ្លូវការនៅពេលបញ្ចប់សិក្ខាសាលា (២៨ កញ្ញា ២០១២)។
នៅសប្ដាហ៍ទី១ សិស្សទាំងអស់ នឹងសិក្សាទៅលើចំណុចសំខាន់ៗ នៃការបង្កើតក្បាច់រាំរូមមានទស្សនីយភាព ទិដ្ឋភាព និងទ្រង់ទ្រាយផ្សេងៗពីគ្នាដូចជា ជំហាននៃការឈប់ (Space stops) ការផ្តោតអារម្មណ៍ (Concentration) ដំណើរចេញ និងចូល (Entrances and Exits) កាយវិការ និងអារម្មណ៍(Gestures and Emotion) ហើយសិស្សទាំងអស់នឹងធ្វើការសម្តែងជាក្រុមតាមរយៈការឆ្នៃប្រឌិតក្បាច់រាំៗថ្មីនៅសប្តាហ៍ទី ២ នូវអ្វីដែលពួកគេបានហឹ្វកហាត់រៀនសូត្រ។
