ពិធីបើកទទួលសិស្សអាហារូបករណ៍ អាន ចនផនសិល្បៈខ្មែរអមតៈ ២០១៣

នៅរសៀលថ្ងៃទី២៥ ខែកញ្ញា ឆ្នាំ ២០១២ សិល្បៈខ្មែរអមតៈបានរៀបចំពិធីទទួលសិស្សអាហារូបករណ៍អានចនផនឆ្នាំ ២០១២-២០១៣ នៅការិយាល័យ​រាជធានីភ្នំពេញ ដោយមានការចូលរួមពីសំណាក់ សិស្សអាហារូបករណ៍ អ្នកសារពត៌មាន សមាជិកគណៈកម្មាធិការអាហារូបករណ៍ លោកអាន ចនផន​ស្ថាបនិកសិល្បៈខ្មែរអមតៈ លោកយន់ ធារ៉ា អគ្គនាយករងនៃអគ្គនាយកដ្ឋានបច្ចេកទេសនៅក្រសូងវប្បធម៌ និងវិចិត្រសិល្បៈ និងលោកសាស្រ្តា​ចារ្យតន្ត្រី​ពិណពាទ្យ សូរ វណ្ណា ។

ថ្លែងនៅក្នុងសុន្ទរកថាស្វាគមន៍នៃការបើកកម្មវិធី លោកអាន ចនផន បានសង្កត់ធ្ងន់លើ បេសកកម្ម របស់សិល្បៈខ្មែរអមតៈ ក្នុងចលនាជួយដល់សិស្សទាំងអស់ ឲ្យទទួលបាននូវការអប់រំកម្រិតខ្ពស់ ដែល រូមបញ្ចូលទាំងជំនាញវប្បធម៌សិល្បៈ និងជំនាញផ្សេងៗដូចជា ភាសាអង់គ្លេស និងកុំព្យូរទ័រជាដើម ។ លោកបានលើកទឹកចិត្តឲ្យសិស្សទាំងអស់ ខិតខំប្រឹងប្រែងព្យាយាមរៀនសូត្រ និងពង្រឹង​សមត្ថភាព​របស់​ខ្លួន ក្នុងនាមជាអ្នកដឹកនាំសិល្បៈកម្ពុជាវ័យក្មេង ដែលត្រូវបន្តវេនថែរក្សាមរតកសិល្បៈបុរាណ និងបង្កើតនូវអ្វីដែលថ្មីសម្រាប់អ្នកជំនាន់ក្រោយៗទៀត ។ លោក យន់ ធារ៉ា ក៏បានសម្ដែង​ពីការព្រួយ​បារម្ភរបស់លោក ទាក់ទិនទៅនឹងអនាគតនៃវប្បធម៌ សិល្បៈ បុរាណខ្មែរដែរ ដោយសារតែបច្ចុប្បន្នភាព គ្រឹះស្ថានសិក្សាសិល្បៈវប្បធម៌ខ្មែរមានចំនួនតិចតួចបំផុត ហើយលោក​គ្រូអ្នកគ្រូដែល​មានជំនាញ​ក៏មិន​មាន​ច្រើនដែរ ។ ប៉ុន្តែ លោកមានក្តីសង្ឃឹមដោយឃើញថា សិល្បៈខ្មែរអមតៈ បាន និងកំពុង បម្រើ​ការងារ​​ជាជំនួយការ និងបណ្តុះបណ្តាលកូនខ្មែរជំនាន់ក្រោយ ដែលមានទេពកោសល្យ​ខាងវិស័យ​សិល្បៈបុរាណខ្មែរ ឲ្យមានឱកាសពង្រឹងសមត្ថភាពរបស់ខ្លួន ជាបង្គោលថែរក្សាការពារ សិល្បៈបុរាណ​ខ្មែរឲ្យបានគង់វង្ស និងឆ្នៃប្រឌិតគំនិតថ្មីៗ ដើម្បីភាពសម្បូរបែបសម្រាប់សិល្បៈខ្មែរ ដែលសកម្មភាព​ទាំងអស់នេះគឺសមស្របទៅនឹងគោលនយោបាយរបស់រាជរដ្ឋាភិបាល “វិស័យឯកជន និងអង្គការជាអ្នកអនុវត្ត ហើយរដ្ឋាភិបាលជាអ្នកគាំទ្រ” ។ 

ប្អូនប្រុស លន់ ជំនិត ជាអ្នកលេងតន្ត្រីភ្លេងការ មកពីខេត្តតាកែវ បានសម្តែងនូវក្តីសោមនស្សរីករាយ “ខ្ញុំសប្បាយចិត្តខ្លាំងណាស់ ដែលបានទទួលអាហារូបករណ៍ពីសិល្បៈខ្មែរអមតៈ ។ ខ្ញុំស្រលាញ់តន្ត្រីខ្សែដៀវ ហើយជីតា​របស់ខ្ញុំជាតន្ត្រីករខ្សែដៀវ ដូចនេះខ្ញុំចង់បន្តមរតកនេះពីគាត់ ។ វាជាមោទនភាព​ខ្លាំងណាស់សម្រាប់​ខ្ញុំដែលបានរក្សានូវមរតក​​ដ៏កម្រ មួយនេះ ។”

កម្មវិធីបានបញ្ចប់ ក្រោមបរិយាកាសរីករាយ ដោយការចែកជូននូវវិញ្ញាបនប័ត្រ បញ្ជាក់ការសិក្សា ព្រមទាំងរង្វាន់លើកទឹកចិត្ត ដល់សិស្ស​ឆ្នើមថ្នាក់​ភាសា​អង់គ្លេស​កាលពីឆ្នាំមុន ។ លោកអាន ចនផន បានបញ្ជាក់ជាចុងក្រោយថា “មិនមែនមានតែបុរសទេដែលរៀនពូកែ ហើយអាចធ្វើការងារសង្គមបាន ប៉ុន្តែពេលនេះ គឺមាន​ស្រ្តី​ជា​​​ច្រើនដែលកំពុងប្រែក្លាយខ្លួនទៅជាធនធានដ៏សំខាន់ក្នុងការអភិវឌ្ឍប្រទេសជាតិដែរ” ៕

សូមអានបន្ថែមអំពី កម្មវិធីអាហារូបករណ៍អាន ចនផន សិល្បៈខ្មែរអមតៈ